RIAS BAIXAS DO NORTE (GALICIA ENTEIRA; 2)

Galicia Enteira 2 ofrece sete completos itinerarios para percorrer as Rías Baixas do Norte dende o Barbanza ata Fisterra. Unha suxerente guía para coñecer unha boa parte das raíces desta vella nación. Padrón, berce do culto xacobeo e solar de Rosalía e o rexurdimento das nosas letras; o Rianxo de Castelao, Manuel Antonio e Dieste, e a galeguidade recreada na antiga cultura dos castros do Neixón e Baroña, na fachenda campesiña dos hórreos de Carnota e Lira, no bo facer dos artesáns inmortalizados nas laudas de Noia, ou nas tradicións vivas nas vilas que de Boiro a Muros medran nun litoral, inzado de valores paisaxísticos, á sombra vixiante dos cumes barbanzáns e dos enigmáticos montes do Pindo.