📗 Libro en asturiano XUEGOS TRADICIONALES ASTURIANOS

El material reuníu nesti llibru sobre xuegos tradicionales asturianos ta dividíu n’once partes, cada una faciendo referencia a un tipu de xuegu: «Xuegos de movimientu», «Xuegos de coru o movimientu llimitáu», «Xuegos con oxetos», «Xuegos con balón», «Lluches», «Xuegos con neños pequeños», «Dellos cancios del corru y de la comba o que xugaben los pas colos fíos», «Cancios y fórmules d’escoyer», «Cancios de campamentu y escursión» y «Traballingües». Los tres informantes del material del llibru (Elena V. M. Fernández Poch y los hermanos Rubén y Xuan Xosé Sánchez Vicente) nacieren ente 1949 (el más vieyu) y 1951 (el más mozu). Los xuegos, cancios y recatafiles d’escoyer que recueyen desurden na casi totalidá de la so memoria (a vegaes incompleta) de los sos xuegos d’aquella época. Como hai que suponer que los sos recuerdos de xuegos activos vienen de los cuatro o cinco años hasta los diez o once, la memoria debe abarcar d’ente 1953 a 1959/60. Los xuegos de menos edá, los de los pas colos ñeños, rememórenlos, ensin dulda, d’una memoria non activa o, acasu, de velos na interacción de los sos pas o familiares con otros hermanos o parientes de menos edá. En tou casu, d’aquelles feches. Dalgunos d’ellos, per otru llau, practicárenlos ellos colos sos fíos.