Kazetaritza ikasketak egiteko asmoa duen orok eta Komunikazio Zientzien Fakultateko lehen mailan matrikulatu diren ikasle guztiek edukiko dute baliagarri liburu hau. 'Kazetaritzaren hasi-masiak' berriemaileen lanbideari ematen zaion lehen hurbilketa denez gero, irakurleak hastapeneko aholkuak, gaiak eta iradokizunak topatuko ditu, beti ere buruan edukita komunikazioaren alorreko profesional prestatuak formatzea dela xede nagusia. Laugarren boterekideak deituak izan direnek oso funtzio garrantzitsua betetzen dute gizartean, txarrerako zein onerako izan daitekeena, eta horrexegatik da premiazkoa unibertsitariek pertsona hauen langintzari sakonki erreparatzea.
Kontu kontari eta bertso kantari datorkigu Iñaki Perurena liburu honetan. Harriaren aitzakian -edo, hobeto esan, harria lagun duela-, mundurik mundu ibiltzeko aukera izan du Perurenak, Euskal Herriko bazter ia guztietan eta mundu zabaleko kontinente ia guztietan. Nola pasadizo xelebreak hala une hunkigarriak, orotariko bizipenak izan ditu Iñakik bere ibilera horietan, eta liburu honetara jaso nahi izan ditu arrazoiren batengatik edo besterengatik gogoangarri gertatu zaizkionak. Berrogeita hamabost pasarte dira denera hemen jasoak. Unean uneko xehetasunen berri ematen digu aurrena Perurenak, hitz lauz; gero, bertso bidez ematen dio errematea. Liburu hau, ordea, ez da Leitzako indartsuaren beste erakustaldi bat, Perurenak ez baitu oraingo honetan ezein marka hausteko asmorik. Aitzitik, harririk mundu eta mundurik harri dabilela izan dituen bizipenen arrastoa uztea beste helbururik gabe osatu du Iñakik liburu hau, bertsoa duelarik oraingo honetan harri.
Toti Martinez de Lezearen eta Juan Luis Landaren Euskal Herriko leiendak/Leyendas de Euskal Herria (berez 2 liburu: euskaraz eta gazteleraz) liburuek bereizgarri hauek biltzen dituzte: gure arbasoen mundu eta pentsakeraren ikuspegi sendo eta ederra eskaintzea. Aita Barandiaranek bildutako altxor paregabeari errespetu osoz jarraituz idatzita daude Euskal Herri osora zabaltzen diren 65 leienda hauek. Geure begien bistan desagertzen ari den ahozko tradizio aberats hori, ilustrazio ikusgarriak daramatza, eta, Euskal Herriko bazter guztiak besarkatzen dituen mapa batean, leienda bakoitzaren kokagunea ere seinalatuta dator.
