📗 Libro en gallego A CANTIGA DE AMOR

En A cantiga de amor, segundo volume da Historia Crítica da Literatura Medieval que publica Xerais, Vicenç Beltrán realiza un esforzo por anovar totalmente os estudios sobre este xénero literario que, logo de ter ocupado o lugar central da estética trobadoresca, foi incomprendido e menosprezado por filólogos, críticos e lectores. Neste volume, o autor revisa o estado da cuestión nos problemas habituais destes estudios (o amor cortés, os problemas de construcción estrófica, a retórica da expresión) pero faino desde unha perspectiva totalmente nova: o intento de construír unha poética cortés que non parta dos presupostos neorrománticos aplicados polo xeral á poesía medieval, senón da experiencia formal, esteticista e experimentalista das vangardas estéticas deste século e da experiencia do formalismo e mailo estructuralismo na moderna teoría literaria. De aí a aparición de aspectos marcadamente innovadores, moi en particular a articulación do poema como un todo artístico a partir dos recursos retóricos, o paralelismo e o conceptismo. A cantiga de amor deixa de ser un apéndice da poesía provenzal para adquirir personalidade propia e orixinal no seo da lírica medieval europea. Un volume imprescindible para o lector afeccionado, o filólogo e o historiador da literatura.