📗 Libro en gallego ESCANER

Quince relatos que constitúen un completo percorrido pola narrativa breve de Ramón Caride publicada dende 1991 ata a actualidade. Relatos que transitan polo real, polo fantástico, polo estraño e polo marabilloso. Unha achega dun dos narradores claves de entre séculos.En Escáner Ramón Caride fai un completo percorrido pola súa narrativa breve publicada dende o ano 1991 ata a actualidade, ofrecendo relatos realistas, na liña do seu volume anterior, Negros espellos (Xerais Peto nº 38), xunto con outros de temática fantástica. Escritor realista, Caride fai nestes relatos a crónica de sucesos da nosa sociedade, facéndoa dende dentro, pola carne e polo sangue. Para Xosé Miranda, prologuista do volume, a escrita de Caride está sempre preto do xénero negro “e por iso é sempre un escritor comprometido”, coa súa sociedade e co seu tempo, tomando partido para ver, para denunciar, para expoñer. Nestes quince relatos de Escáner hai unha visión de conxunto do ser humano. Nos catro primeiros relatos, inéditos ata o momento, (“Foto-Shock”, “Carta a Berta”, “Hendra” e “Viaxe de Volta”) e cos que comeza o volume, están tódalas tendencias da narrativa curta de Caride, desde o realismo, a denuncia, o compromiso e mesmo a hiperrealidade de “Foto-Shock”, un texto fondamente narrativo e fondamente reflexivo, que escarva tanto na alma humana como na situación do mundo; ata a ciencia-ficción de “Hendra”, unha ciencia ficción tanto ao xeito do cinema como biolóxica ou psicolóxica; pasando polo inusual final feliz de “Viaxe de volta”, esa case segunda oportunidade que só se lles con-cede aos felices como Ulises, e pola amarga crítica ao mundo literario, tan inzado de oportunistas e alpabardas, da “Carta Berta”.