📗 Libro en gallego JOHAN DE CANGAS, MARTIN CODAX, MEENDINHO

Johán de Cangas, Martín Codax e Meendinho son os tres xograres obxecto de homenaxe na celebración das Letras Galegas de 1998. A tradición manuscrita medieval galego-portuguesa transmítenos, de cada un deles, unha obra moi breve a penas once textos; sen embargo, a concisión numérica dos textos vese compensada pola intensidade, brillantez e alento que latexan ao longo das estrofas conservadas. Johán de Cangas, Martín Codax e Meendinho describen nas súas cantigas secuencias emocionais, verdadeiras estampas cheas de paixón que nos sorprenden pola aparente sinxeleza, pola vitalidade das referencias populares pero tamén polo procurado esplendor técnico, que vén demostrar, en suma, que estamos diante de tres verdadeiros ourives do xénero lírico. A través dos tres xograres do mar de Vigo homenaxéase, ademais, ao conxunto da lírica trobadoresca galego-portuguesa. O Cancioneiro de Ajuda, o Cancioneiro da Biblioteca Nacional, o Cancioneiro de Vaticana, o Pergamiño Vindel... gardan alfaiais -máis de 1600 composicións pertencentes a 161 autores- que nos devolven a un tempo no que Galicia foi dona de seu, centro de cultura e creadora dun idioma capaz para as máis elevadas expresións. A presente obra, con características semellantes á tradicional serie de "Fotobiografías" que anualmente prepara Xerais con motivo da celebración do Día das Letras Galegas, recolle cinco ensaios que iluminan sobre a importancia da nosa lírica trobadoresca, ademais da edición dos textos e a reproducción das súas fontes.