📗 Libro en gallego O ZOCO

Un estralo de milicroque no cristal, e todo se torna escuro.
En O ZOCO transfórmase a realidade da guerra española de 1936-39 nun álbum ilustrado. Neste caso, o foco céntrase nos danos colaterais que provoca, especialmente na infancia.
O mundo do protagonista esfarélase: a seguridade familiar, os xogos, a escola e a aprendizaxe bórranse dun golpe, e a violencia emerxe no entorno. O horror e o medo velan os soños do cativo e alimentan os seus pesadelos. O silencio campa arredor.
A perda e a angustia que comporta pairan polas páxinas do libro: a mestra, os amigos, a ausencia temporal do pai… ata que a morte se apropia de todo.
Para aturar a desfeita, o neno evoca a época prebélica ou foxe a través dos contos, ata o punto de que, inocentemente, confunde a guerra cos estralos da festa, cun fatal desenlace.
Realidade e ficción mestúranse, co texto dramático de Antón Fortes e as poéticas metáforas visuais realizadas a grafito por David Álvarez, que invitan a desentrañar múltiples interpretacións cun estilo único e unha calidade innegable.
Un álbum moi emotivo que reivindica a memoria histórica e mostra a substancia da guerra coa esperanza en erradicala.