Juan Luis Camacho Lliteras

Os diversos lugares e microclimas de Galicia dan un abano de posibilidades que non se encontran noutras áreas da Península Ibérica, que fai que debamos considerar o termo "Xardinarías" (en plural). Nesta guía coméntanse unha serie de recomendacións sobre as especies, os labores e traballos a realizar no xardín. Non é exhaustiva, dada a diversidade galega, mais todas as especies aquí mencionadas foron obxecto de traballos e prácticas, así como dun rigoroso seguimento no seu desenvolvemento

Obra divulgativa dirixida a todas as persoas interesadas en practicar o cultivo de hortalizas. As variedades citadas neste traballo están no mercado desde hai anos e, tempada tras tempada, seguen demostrando a súa mellor adaptación ao solo e á climatoloxía de Galicia. As sementes que se mencionan tamén se atopan sen dificultade nos comercios de produtos agrarios. Inclúense os híbridos F-1, obtidos por procedementos de cultivo e selección para mellorar a súa calidade.

Esta guía representa o mellor instrumento para a plantación e mantemento de árbores froiteiras en Galicia. Escrita cunha linguaxe sinxela e clara, alonxada de tecnicismos, está dirixida, a especialistas, aos moitos afeccionados e afeccionadas que cultivan en parcelas familiares dedicadas ao propio esparcemento, así como ás persoas interesadas no coñecemento da nosa variada riqueza froiteira. Complétase con esquemas prácticos que serven de pauta para a realización dos enxertos e a poda, e de fotografías que axudan á identificación das enfermidades máis frecuentes. Inclúe así mesmo un interesante receitario para a elaboración de conservas e licores de froitas.

Manual para as persoas interesadas nun coñecemento iniciático sobre os viños do noso país. Os diferentes capítulos deste libro son unha novidade no panorama editorial desta temática, informando das vides e uvas, das Denominacións de Orixe, da historia da vide en Galicia e, o máis interesante, as propostas técnicas de como achegarse ao consumo do viño, cos fundamentos universalmente utilizados e recoñecidos. Inclúe un glosario e unha antoloxía sobre a relación do viño e a arte en Galicia.

Nesta guía práctica, o autor fai un percorrido polas cuestións máis importantes a ter en conta para elixir o tipo de reprodución máis axeitada a cada árbore ou arbusto -enxerto, gallo ou mergullo- e a forma de levala a bo fin no noso país. Por exemplo, no caso dos enxertos achega unha serie de consideracións como: o seu desenvolvemento, a compatibilidade entre o patrón e o enxerto, como e cando enxertar, tipos de enxertos, causas do fracaso, variedades máis adecuadas para os patróns...