Xosé Chao Rego

Neste libro fermoso, Xosé Chao Rego ofrece cen traducións doutros tantos fragmentos da Biblia. Un traballo de tradución e interpretación concienzudo e erudito, acompañado de comentarios, notas e versificacións, que constitúe unha síntese acaidísima para que o grande público poida achegarse ao texto bíblico na nosa lingua. O nacemento de Israel, a alianza de Abraham, a risa de Sara, ¿qué sucedeu en Sodoma?, a vida dos patriarcas, o nacemento da Pascua, a vida no deserto, no cume do Sinaí, as dez palabras, a morte de Moisés, Sansón contra os filisteos, a vocación de Samuel, o retorno da Arca, a casa de David, a orixe do clan humano, de Noé a Babel, Ezequiel, a sentinela, a claudicación de Xonás, a econstrución de Xerusalén son algunhas das pasaxes bíblicas interpretadas dende o coñecemento bíblico de Xosé Chao Rego. Un libro ilustrado a toda cor, en cada unha das súas páxinas, por Soledad Pite Sanjurjo e Pedro Ávila Durán, constítúe unha das máis atractivas edicións do texto bíblico en galego e a primeira ilustrada por artistas nosos.

Este libro recolle as memorias de Igrexa de Xosé Chao Rego, unha das figuras máis brillantes do pensamento galego contemporáneo, o escritor e ensaísta que quizais máis páxinas teña publicado na nosa lingua. Un volume que completa o percorrido vital e biográfico iniciado no libro de Daniel López Muñoz "Conversa con Xosé Chao Rego" (Xerais 2002). Nestas memorias, escritas nunha prosa coidada, fermosa e cativadora, o autor rememora dende a súa peripecia vital de neno vilego, os seus anos de formación e docencia no seminario, as súas estadías en Roma e Alemaña, ata o seu exercicio do ministerio de sarcedotal durante dezasete anos na ferrolá parroquia de Santa Mariña do Vilar. As memorias fascinantes dun home libre e xusto ao que nada que humanice e libere lle resultou alleo e indiferente; as lembranzas dun transgresor que marcou a súa vida toda pola convicción profunda que "fóra do mundo non hai salvación".

A condición homosexual é o froito de vinte e cinco anos de preocupación intelectual, científica e sobre todo humana polo fenómeno do "amor que non ousa dicir o seu nome". Cunha linguaxe asequible e unha gran claridade expositiva, Chao Rego aborda as condutas homoeróticas desde a perspectiva da bioloxía e a teoloxía. Pero este documentado libro non é un tratado aséptico e neutro, senón unha razoada e serena alegación contra a discriminación e os prexuízos homofóbicos que aínda hoxe seguen a constituír o trazo hexemónico da nosa sociedade en relación con este tema.

Dirixido a todas as persoas interesadas na historia do pensamento e de gran utilidade como material complementario para as materias da Filosofía e Historia no Bacharelato, este estudo profundiza en aspectos singulares do pensamento e obra de Prisciliano.