UN CADELO MENOS E 29 HISTORIAS MAIS

Publicar os contos de Fernando Sabino é unha magnífica proposta de Gonzalo Navaza, que coordinou a traducción desta antoloxía realizada por oito alumnos durante os cursos 94-95 e 95-96 na Facultade de Traducción e Interpretación de Vigo. Sabino (Belo Horizonte, 1923), consagrado no 79 con O grande mentecapto, ten chegado a superar as corenta edicións nas súas novelas, o que dá unha idea da popularidade que alcanzou no Brasil e xustifica, sumando a súa destreza para a ficción súbita, a inclusión de Un cadelo menos e 29 historias máis na colección Ferros. Este libro pon en circulación entre nós, moi en especial para os lectores gustantes do relato breve, enxeñoso e irónico, a obra dun autor que sen dúbida será lido con agrado e satisfacción.