📗 Libro en gallego CRONICA DE OFIUSA

Francisco Vázquez Chantada

Novela de xénero fantástico e novela de educación, na que tamén hai cabida para a reivindicación política, Crónica de Ofiusa xira arredor da viaxe iniciática dun personaxe —a penas un neno cando comeza o relato— que se ve sometido a unha serie de probas, e que ó longo da novela experimenta a metamorfose que o converte no guerreiro capaz de liberar o seu pobo da tiranía.
«Esta é a historia dunha viaxe polas terras míticas de Ofiusa. Para Ando é, ademais, unha viaxe iniciática.
Desde as terras de Sonán vai partir para converterse en guerreiro na procura de Ofiusa... Pero antes precisa superar dúas probas nas que terá que demostrar firmeza e valentía. E así, por fin, deixa atrás a casa e tamén a infancia «...Ando sabe que o sol mora alén destes outeiros, cara ó nacente, e vai tras del...». Cruzando o Río Maior cos seus estraños moradores, atravesa por extensas terras baixo os estandartes de Non Fal.
Atopará a Axe, o amigo guliaire. No Palacio de Novelúas lerá —coa axuda da pequena Dosinda— nas «pedras abrideiras», a historia resgardada do País e as nove batallas que precederon a dominación. Alí tamén coñece a Queade e o amor e sentirá o alento da mesma morte a rentes del... mentres se prepara para enfrontarse co inimigo.
Como di o Cántico que pecha a novela: “... mentres o tempo de vivir en paz non chega, e a vida non se modifica, que as vellas derrotas nos fagan fortes, que o alento da terra prosiga onde campa o silencio e seixo duro”».