📗 Libro en gallego OUTROS 50 XOGOS DA LINGUA

Con este libro, vense complementar a primeira entrega de propostas didácticas para o ensino de lingua feita en 50 xogos de lingua. Técnicas de comunicación oral e escrita (Xerais, 1994). O seu autor, Carlos Medrano basea o seu magnífico traballo na concepción do valor instrumental da lingua como punto de partida do traballo na aula e unha orientación metodolóxica que atopa nas actividades lúdicas a súa mellor ferramenta. No seu conxunto estes novos 50 xogos ofrecen un abano bastante amplo de recursos para que na aula se activen os coñecementos e destrezas que xa se posúen e, ao mesmo tempo, se desenvolvan novas aprendizaxes. Cada un dos xogos preséntase indicando o procedemento de traballo (as principais habilidades lingüísticas que interveñen na realización da técnica), o contido (tanto nos ámbitos gramaticais -ortografía, léxico, morfoloxía e sintaxe- como non gramaticais -expresión libre, lectura comprensiva, lectura expresiva-, a participación (individual, en parella, en grupo, colectiva), o xeito de realización da actividade e as variantes que pode adoptar o xogo. Un libro, pois, práctico e divertido para enfocar o ensino das técnicas de comunicación oral e escrita.