📗 Libro en gallego UN GATO NA ARBORE (GALLEGO)

Un gato cando está a ser perseguido por un can, sobe por unha árbore moi alta e logo non é quen de baixar. Os que pasan á beira da árbore soben coa intención de axudalo; pero a cousa complícase cada vez máis e a solidariedade de bombeiros, veciños e parentes acaba por ser un obstáculo para a árbore, que xa non soporta tanto peso… O conto desenvólvese en escenarios cotiáns, onde realidade e fantasía se mesturan. Mais o autor dálle unha fasquía de credibilidade a todos estes sucesos que de primeiro poderían parecer inverosímiles. Ao cabo, todo se resolve grazas á intervención da natureza que, de maneira sinxela e natural, reconduce a historia cara a un final feliz. Un conto con moito humor que emprega os recursos esenciais da oralidade. Apréciase o oficio do autor, contacontos, que olla os pequenos detalles da vida, ao tempo que esperta a curiosidade pola lectura e pola experiencia literaria. A historia presenta recursos acumulativos usados de forma lúdica e moi expresiva, e ofrece posibilidades para a dramatización e a experimentación co feito literario. O narrador tamén lle fai chiscadelas ao lector e dálle información que, en chave cómica, axuda a comprender o relato. Á parte, estas chamadas introducen pausas, nunha historia estimulante e atractiva que se desenvolve a un ritmo trepidante.